MATTHEW
मत्ती
यीशु रौ वंश (लूका 3:23-38)
1
1 अब्राहमा री सन्तान, दाऊदा री सन्तान, यीशु रौ वंश। 2 अब्राहम कु इसहाक पैदौ हुऔ, इसहाका कु याकूब पैदौ हुऔ, याकूबा कु यहूदा और तेसरै भाई पैदै हुऐ 3 यहूदा और तामारा कु फिरिस और जोरह पैदौ हुऔ, फिरिसा कु हिस्त्रोन पैदौ हुऔ, और हिस्त्रोना कु एराम पैदौ हुऔ, 4 एरामा कु अम्मीनादाब पैदौ हुऔ, अम्मीनादाबा कु नहशोन, और नहशोन कु सलमोन पैदौ हुऔ, 5 सलमोन और राहबा कु बोअज पैदौ हुऔ, बोअज और रुता कु ओबेद पैदौ हुऔ, और ओबेदा कु यिशै पैदौ हुऔ, 6 और यिशै कु दाऊद राज़ौ पैदौ हुऔ। और दाऊदा कु सुलैमान तियां छ़ेउड़ी कु पैदौ हुऔ ज़ुण पैहला उरिय्याह रै छ़ैऊड़े थै, 7 सुलैमाना कु रहबाम पैदौ हुऔ, रहबामा कु अबिय्याह पैदौ हुऔ, और अबिय्याहा कु आसा पैदौ हुऔ, 8 आसा कु यहोशाफात पैदौ हुऔ, यहोशाफाता कु योराम पैदौ हुऔ, और योरामा कु उज्जियाह पैदौ हुऔ, 9 उज्जियाहा कु योताम पैदौ हुऔ, लयौतामा कु आहाज पैदौ हुऔ, और आहाजा कु हिजकिय्याह पैदौ हुऔ, 10 हिजकिय्याहा कु मनश्शिह पैदौ हुऔ, मनश्शिहा कु आमोन पैदौ हुऔ, और आमोना कु योशिय्याह पैदौ हुऔ; 11 और बंदी बौणियौ बेबीलोन डेऊंणा रै बौग्तै दी योशिय्याह कु यकुन्याह, और तेसरौ भाई पैदौ हुऔ। 12 बंदी बौणियौ से बेबीलोना दी निणा कु बासिऐ यकुन्याह कु शालतिएल पेदा हुऔ, और शालतिएला कु जरुब्बाबिल पैदौ हुऔ, 13 जरुब्बाबिला कु अबीहूद पैदौ हुऔ, अबीहूदा कु इल्याकीम पैदौ हुऔ, और इल्याकीमा कु अजोर पैदौ हुऔ, 14 अजोरा कु सदोम पैदौ हुऔ, सदोमा कु अखीम पैदौ हुऔ, अकीमा कु इलीहूदा पैदौ हुऔ, 15 इलीहूदा कु इलियाजार पैदौ हुऔ, इलियाजारा कु मतान पैदौ हुऔ, मताना कु याकूब पैदौ हुऔ, 16 याकूबा कु यूसुफ पैदौ हुऔ, ज़ुण मरियमा रौ बोउटौ थौ, और मरियमा कु यीशु ज़ासलै मसीह भी बोलाई, पैदौ हुऔ। 17 इणै कौरी अब्राहमा कु दाऊदा झ़ाऊं चौदहा पीड़ी हुई, और दाऊदा कु बेबीलोना लै गुलाम हुईऔ पौउंच़णै झ़ाऊं चौदहा पीड़ी, गुलाम चाणीऔ बेबीलोना दी पौच़णै झ़ाऊं रै बौग्ता कु मसीह झ़ाऊं चौदहा पीड़ी हुई।
यीशु रौ ज़ौनम (लूका 1:26-38, 2:1-7)
18 यीशु मसीह रौ जनम इणै कौरी हुऔ, कि ज़ेबी तेसरी मां मरियमा री मांगणी युसुफा आइलै हुई गोई, ता तिंउरै कौठै हौणै कु पैहलै ई मरियम पवित्र आत्मा री तौरफा कु गौरकड़ी हुई। 19 तैबै तियांरौ बोउटौ यूसुफ ज़ुण धर्मी थौ और तिऐं बदनाम कौरणौ नाईं च़ाहा थौ, तिऐं च़ुटुक च़ार पोरु छ़ाड़नै रै बारै दी सुंच़दै लागौ। 20 ज़ेबी सेऊ ईऊं बुशै सुंच़दै थौ लागौ औन्दौ ता प्रभु रौ स्वर्गदूत तेसरै सुइणै दी दिशियौ बोलदै लागौ, “ओ यूसुफ! दाऊदा री औलाद, तू आपणी छ़ेउड़ी मरियम आपणै रै काऐ आणना लै नाईं डौर, कैलैकि ज़ो तियांंरै गर्भा दी आ, सेऊ पवित्र आत्मा री तौरफा कु आ। 21 सै छ़ोहरु पैदौ कौरा और तू तेसरौ नाऊं यीशु छ़ाड़ै, कैलैकि सेऊ आपणै लोगु रौ तिंउरै पापा कु छ़ुटकारौ कौरा लौ।” 22 एऊ सब एथीलै हुऔ कि ज़ो वचन प्रभु रै गुरु रै ज़रीऐ बोलौ औन्दौ थौ, सेऊ पुरौ हुआ : 23 “देखौ, एक कुंवारी गौरकड़ी हुआ और एक छ़ोहरु पैदौ कौरा, और तेसरौ नाऊं इम्मानुएल हुणौ, ”ज़ेथरौ मतलब आ—परमेश्वर आमु आइलै आ। 24 तैबै यूसुफ नीजा कु बीऊज़ुऔ प्रभु रै दूता रौ हुकमा कौरी आपणी छ़ेउड़ी आपणै घौरै आणी; 25 और ज़ेबी झ़ाऊं तिआंरौ छ़ोहरु नाईं हुआ लौ तेभी झ़ाऊं सेऊ तियां काऐ नाईं डैऔ : और तिणीऐ तेसरौ नाऊं यीशु छ़ाड़ौ।