MATTHEW
मत्ती
यीशु की पीढ़ी
(लुका 3:23-38)
1
1 अब्राहम की ऊलाद, दाऊद की ऊलाद, यीशु मसीह की पीढ़ीI 2 अब्राहम तै इसहाक जण्या, इसहाक तै याकूब जण्या, याकूब तै यहूदा अर उसके भाई जण्ये, 3 यहूदा अर तोमार तै फिरिस, जोरह जण्ये, फिरिस तै हिस्त्रोन जण्या, हिस्त्रोन तै एराम जण्या, 4 एराम तै अम्मीनादाब जण्या, अम्मीनादाब तै नहशोन, अर नहशोनतै सलमोन जण्या, 5 सलमोन अर रहाब तै बोअज जण्या, बोअज अर रुत तै वोबेद जण्या, अर वोबेद तै यिशै जण्या, 6 अर यिशै तै दाऊद राजा जण्याI अर दाऊद तै सुलैमान उस जनानी तै जण्या जो पैहले उरिय्याह का की बीरबान्नी थी, 7 सुलैमान तै रहबाम जण्या, रहबाम तै अबिय्याह जण्या, अर अबिय्याह तै आसा जण्या, 8 आसा तै यहोशाफात जण्या, यहोशाफात तै योराम जण्या, अर योराम तै उज्जियाह जण्या, उज्जियाह तै योताम जण्या, योताम तै आहाज जण्या, अर आहाज तै हिजकिय्याह जण्या, 9 उज्जियाह तै योताम जण्या, योताम तै आहाज जण्या, अर आहाज तै हिजकिय्याह जण्या, 10 हिजकिय्याह तै मनश्शिह जण्या, मनश्शिह तै आमोन जण्या, अर आमोन तै योशिय्याह जण्या; 11 अर कैदी होकै बेबीलोन जाण कै बख्त म्ह योशिय्याह तै यकुन्याह, अर उसके भाई जण्येI 12 कैदी होकै बेबीलोन खिन्दाए जाण कै पाच्छै यकुन्याह तै शालतिएल जण्या, अर शालतिएल तै जरुब्बाबिल जण्या, 13 जरुब्बाबिल तै अबीहूद जण्या, अबीहूद तै इल्याकीम जण्या, अर इल्याकीम तै अजोर जण्या, 14 अजोर तै सदोक जण्या, सदोक तै अखीम जण्या, अर अखीम तै इलीहूद जण्या, 15 इलीहूद तै इलियाजार जण्या, इलियाजार तै मत्तान जण्या, मत्तान तै याकूब जण्या, 16 याकूब तै यूसुफ जण्या, जो मरियम का धणी था, अर मरियम तै यीशु जो मसीह कुह्वावै सै, जण्याI 17 इस तरियां अब्राहम तै दाऊद तैई चौदहा पीढ़ी होई, अर दाऊद तै बेबीलोन नै कैदी होकै खिन्दाये जाण तैई चौदाहा पीढ़ी, अर कैदी होकै बेबीलोन नै खिन्दाए जाण कै बख्त तै मसीह तैई चौदाहा पीढ़ी होई I
मसीह का जन्म
(लूका1:26-38;2:1-7)
18 यीशु मसीह का जन्म इस तरियां होया, कै जिब्ब उसकी माँ मरियम कि सगाई यूसुफ कै गैल होग्यी, तो उनकै मिलण तै पैहल्या ए वा पवित्र आत्मा की ओड़ तै गर्भवती पायी गयीI 19 इस करकै उसकै धणी नै जो धर्मी था उसनै बदनाम नी करना चाहवै था उस ताही चुपके तै छोड़ण का बिचार करयाI 20 जिब्ब वो इन बातां नै सोचै ए था कै प्रभु का सुर्गदूत उसनै सपनै म्ह आकै कहण लाग्या, “हे यूसुफ! दाऊद की ऊलाद, तू आपणी बीरबान्नी मरियम नै अपणे याड़ै ल्याण तै ना डर, क्यूँके जो उसकी कोख म्ह सै, वो पवित्र आत्मा की वोड़ तै सैI 21 वो बेट्टा जाम्यैगी अर तू उसका नाम यीशु धरिये, क्यूँके वो अपणे माणसां का उनकै पाप तै उद्धार करैगाI” 22 यो सारा इस खात्तर होया के जो वचन प्रभु नै नब्बी कै जरिये कह्या था, वो पूरा: हो 23 “देक्खो एक कुँवरी गर्भवती होगी अर एक छोरा जण्येगी, अर उसका नाम इम्मानुएल धरया जावैगा,” जिसका मतलब सै-पणमेशर म्हारै गैल सैI 24 फेर यूसुफ नीद तै जाग कै प्रभु कै दूत के हुक्म कै मुताबिक अपणी बीरबान्नी नै आपणे याड़ै ले आया; 25 अर जिब्ब ताही उसनै छोरा ना जण्या जिब्ब तक वो उसकै धोरै न्ही ग्या: अर उसनै उसका नाम यीशु धरयाI