MATTHEW
मत्ती
यीशुए रा कुल
लुका 3:23-38
1
1 अब्राहमो री ल्वाद, दाऊदो री ल्वाद, प्रभु यीशुओ रा कुल। 2 अब्राहमो रे इसहाक ऊआ; इसहाको रे याकूब ऊआ; याकूबो रे यहूदा और यहूदो रे ओर बी बऊत पाई ऊए। 3 यहूदो रे फिरिस, यहूदो री लाड़ी तामारा ते जोरह ऊआ, फिरिसो रे हिस्रोन जम्मेया और हिस्रोनो रे एराम ऊआ; 4 एरामो रे अम्मीनादाब ऊआ, अम्मीनादाबो रे नहशोन ऊआ और न हशोनो रे सलमोन ऊआ। 5 सलमोन और तेसरी लाड़ी राहाबा ते बोअज ऊआ, बोअज और रूता रे ओबेद ऊआ और ओबेदो रे यिशै ऊआ 6 यिशै रे दाऊद राजा जम्मेया। 7 दाऊदो रे सुलेमान तेसा जवाणसा ते ऊआ, जो पईले ऊरिय्याहो री लाड़ी थी। 8 सुलेमानो रे रहबाम ऊआ; रहबामो रे अबिय्याह, अबिय्याहो रे आसा, आसा रे यहोशफात, यहोशफातो रे योराम और योरामो रे उज्जियाह ऊआ। 9 उज्जियाहो रे योराम, योरामो रे आहाज और आहाजो रे हिजकिय्याह ऊआ। 10 हिजिकिय्याहो रे मनश्शिह, मनश्शिहो रे आमोन और आमोनो रे योशिय्याह ऊआ। 11 जेबे इस्राएली लोका खे बन्दी बणाई की बाबूलो खे लई जाणे लगी रे थे, तेबे तेस बख़ते योशिय्याहो रे यकुन्याह और तेसरे ओर बी पाई ऊए।
12 बन्दी ऊई की बाबुलो रे पँऊछाणे ते बाद यकुन्याहो रे शालतिएल जम्मेया और शालतिएलो रे जरूब्बाबिल ऊआ। 13 जरूब्बाबिलो रे अबीहूद, अबीहूदो रे इल्याकीम और इल्याकीमो रे अजोर ऊआ। 14 अजोरो रे सदोक, सदोको रे अखीम और अखीमो रे इलीहूद ऊआ। 15 इलीहूदो रे इलियाजार, इलियाजारो रे मत्तान और मत्तानो रे याकूब ऊआ। 16 याकूबो रे यूसुफ ऊआ, जो मरियमा रा लाड़ा था, तेसा रे प्रभु यीशु जम्मेया, जिना खे मसीह बोलेया जाओआ। 17 अब्राहमो ते दाऊदो तक सारिया चौदा पीढ़िया ऊईया और दाऊदो ते इस्राएलिया खे बाबूलो तक बन्दी बणाई की पँऊछाणे तक चौदा पीढ़िया ऊईया और बाबूलो तक बन्दी बणाई की पँऊछाणे ते मसीह तक चौदा पीढ़िया ऊईया।
यीशुए रा जन्म
लुका 1:26-38, 2:1-7
18 एबे प्रभु यीशु मसीह रा जन्म ईंया ऊआ, जेबे तिना री आम्मा मरियमा री मंगणी यूसुफो साथे ऊई, तेबे तिना रे कट्ठे ऊणे ते पईले ई मरियम पवित्र आत्मा री तरफा ते गर्भवती ऊई गी। 19 तेबे तेसा रा लाड़ा यूसुफ जो तर्मी था, से तेसा खे बदनाम नि करना चाओ था, तिने आपणे मनो रे सोचेया कि मा ये छाडी देणी। 20 जेबे से ऐड़ा सोचणे ई लगी रा था, तेबे प्रभुए रा स्वर्गदूत तेस खे सुपने रे दिशेया और से तेस खे बोलणे लगेया, "ओ दाऊदो रा पाऊ यूसुफ! तूं आपणी लाड़ी मरियमा खे आपणे कअरे ल्याउणे ते नि डर, कऊँकि जो तेसा रे पेटो रे बच्चा ए, से पवित्र आत्मा रिया तरफ़ा तेआ। 21 तेसा रे एक पाऊ जमणा तैं तेसरा नाओ 'यीशु' राखणा; कऊँकि तेस आपणे लोका रा तिना रे पापो ते उध्दार करना"।
22 ये सबकुछ तेबे ऊआ, ताकि जो वचन प्रभुए भविष्यबक्ता ते बुलाई राखे, सेयो पूरे ओ 23 कि, "देखो, एक कुंआरी गर्भवती ऊणी, तेसा रे एक पाऊ जमणा और तेसरा नाओ ‘इम्मानुएल’ ऊणा, जेतेरा अर्थ ए- परमेशर आसा साथे ए 24 तेबे यूसुफ सयी की उठेया और जिंया ई तेस खे परमेशरो रे स्वर्गदूते बोलेया था, तिंया ई से आपणी लाड़िया खे आपणे कअरे ली आया 25 और जदुओ तक तेसा रे पाऊ नि जम्मेया, तदुओ तक यूसुफ तेसा गे नि गया और तेबे तेसा रे पाऊ जम्मेया और तिने तेसरा नाओ 'यीशु' राखेया।