Matthew
मत्ती
1
1 अब्राहम री ओलाद,दाऊद री औलाद, यीशु मसीह जी रा खानदान। 2 अब्राहम का इस्हाक पैदा होया, इस्हाक का याकूब पैदा होया, याकूब का यहूदा अते तिसेरे भ्याळ पैदा होए, 3 यहूदा ते तामार का फिरिस ते जोरह पैदा होए, फिरिस का हिस्त्रोन पैदा होया, ते हिस्त्रोन का एराम पैदा होया, 4 एराम का अम्मीनादाब पैदा होया, अम्मीनादाब का नहशोन, अते नहशोन का सलमोन पैदा होया, 5 सलमोन ते राहब का बोअज पैदा होया, बोअज ते रूत का ओबेद पैदा होया, अते ओबेद का यिशै पैदा होया, 6 ते यिशै का दाऊद राज्जा पैदा होया। ते दाऊद का सुलैमान तिस जनानी का पैदा होया जेह्ड़ी पैल्ले उरिय्याह री लाड़ी थी, 7 सुलैमान का रहबाम पैदा होया, रहबाम का अबिय्याह पैदा होया, ते अबिय्याह का आसा पैदा होया, 8 आसा का यहोशाफात पैदा होया, यहोशाफात का योराम पैदा होया, योराम का उज्जियाह पैदा होया, 9 उज्जियाह का योताम पैदा होया, योताम का आहाज पैदा होया, अते आहाज का हिजकिय्याह पैदा होया, 10 हिजकिय्याह का मनश्शिह पैदा होया, मनश्शिह का आमोन पैदा होया, ते आमोन का योशिय्याह पैदा होया; 11 अते कैद होई करी बेबीलोन जाणे रे बेल्ले योशिय्याह का यकुन्याह, ते तिसेरे भ्याळ पैदा होए। 12 कैद होई करी बेबीलोन पुजाए जाणे का बाद यकुन्याह का शालतिएल पैदा होया, 13 जरुब्बाबिल का अबीहूद पैदा होया, अबीहूद का इल्याकीम पैदा होया, ते इल्याकीम का अजोर पैदा होया, 14 अजोर का सदोक पैदा होया, सदोक का अखीम पैदा होया, ते अखीम का इलीहूद पैदा होया, 15 इलीहूद का इलियाजार पैदा होया, इलियाजार का मत्तान पैदा होया, अते मत्तान का याकूब पैदा होया, 16 याकूब का यूसुफ पैदा होया, जेह्ड़ा मरियम रा लाड़ा थिया, अते मरियम का यीशु जी जिन्हा जो कि मसीह बोलेया जांदा, पैदा होए। 17 इस तरिक्के कने अब्राहम का दाऊद ताँईं चौदाह् पीढ़ी होईयाँ, ते दाऊद का बेबीलोन जो कैद होई करी पुजाए जाणे ताँईं चोदाह् पीढ़ियाँ, अते कैद होई करी बेबीलोन जो पुजाए जाणे रे बेल्ले का मसीह ताँईं चोदाह् पीढ़ी होईयाँ।
यीशु जी रा पैदा होणा
18 यीशु मसीह जी रा जन्म इस तरिक्के कने होया, जाँ तिन्हेरी अम्मा मरियम री मंगोळी यूसुफ कने होई गेई अत्ते तिन्हेरे इक-दुज्जे रे मिलाप का पैल्ले ई पता चलेया कि मरियम पवित्र आत्मा री सक्ति कने दुपराणी है। 19 इधेरे ताँईं तिसेरे लाड़े यूसुफ ने जे इक धर्मी मह्णु थिया इस गल्ल जो जाहिर करी के मह्णुआं बिच तिस जो बदनाम नी करणा चांदा थिया, इधेरे तांई तिन्ने सोची लेया कि चुप-चाप ई मंगणी तोड़ी देयाँ 20 जाँ से इन्हा गल्लां रे बारे अन्दर सोच्चेया ई करदा थिया ता प्रभु रा स्वर्गदूत तिस जो सुपने अन्दर आई करी बोलणा लगेया, “ओ यूसुफ! दाऊद री औलाद, तू मरियम जो अपणी लाड़ी बणाणे का मत डर, किजोकी जे बच्चा तिसेरे पेट अन्दर है, से पवित्र आत्मा री तरफ का है। 21 तिस ने इक निक्के जो जमणा ते तू तिसेरा नां यीशु रख्खेयाँ, किजो कि तिनिए अपणे मह्णुआँ रा तिन्हेरे पापाँ का उद्धार करणा।” 22 एह् सब इधेरे ताँईं होया कि जे वचन प्रभू ने भविस्यवाणी करणे वाळेयाँ रे जरिए जे किच्छ बोलेया थिया, से पूरा होई जाओ: 23 “दिख्खो, इक कुआँरी ने दुपराणी होणा ते तिस ने इक्क निक्के जो जमणा, ते तिसेरा नां इम्मानुएल रख्खेया जाणा, “जिसेरा मतलब हुन्दा – परमेश्वर म्हारे कन्ने हिन। 24 ता यूसुफ निन्दर का जाग्गी करी प्रभु रे दूत रे हूकम रे ह्साब कने अपणी लाड़ी जो ब्याई करी अपणे घरे लेई आया; 25 ते जाँ ताँईं तिस ने निक्का नी जम्मेया ताँ ताँईं यूसुफ तिसेरे नेड़े नी गेया: अते यूसुफ ने अपणे बच्चे रा नां यीशु रख्खेया।