MATTHEW
मत्ती
यीशये रा खानदान
1
1 अब्राहमा री सन्तान, दाऊदा री सन्तान, यीशु मसीह रा खानदान। 2 अब्राहमा ते इसहाक जम्मया, इसहाका ते याकूब, याकूबा ते यहूदा कने तिसरे भाई जम्मे, 3 यहूदा कने तामार ते फिरिस कने जोरह जम्मे, फिरिस ते हिस्रोन जम्मया, कने हिस्रोन ते एराम जम्मया, 4 एराम ते अम्मीनादाब जम्मया, अम्मीनादाब ते नहशोन, कने नहशोन ते सलमोन जम्मया, 5 सलमोन कने राहब ते बोअज जम्मया, बोअज कने रुता ते ओबेद जम्मया कने ओबेदा ते यिशै जम्मया, 6 कने यिशै ते दाऊद राजे रा जन्म हुया।
कने दाऊदा ते शुलैमान तिसा जनाना ते जम्मया सै जे पैहले उरिय्याह री घराऔऴी थी, 7 सुलैमान ते रहबाम, रहबाम ते अबिय्याह जम्मया, कने अबिय्याह ते आसा जम्मया, 8 आसा ते यहोशाफात जम्मया, यहोशाफात ते योराम जम्मया, कने योराम ते उज्जियाह जम्मया, 9 उज्जियाह ते योताम जम्मया, योतामा ते आहाज जम्मया, कने आहाजा ते हिजकिय्याह जम्मया, 10 हिजकिय्याह ते मनश्शिह जम्मया, मनश्शिहे ते आमोन जम्मया, कने आमोन ते योशिय्याह जम्मया; 11 कने बंदी हुईने बेबीलोन जाणे रिया बेला योशिय्याह ते यकुन्याह, कने तिसरे भाई जम्मे।
12 बंदी हुईने बेबीलोन च पजवाणे ते बाद यकुन्याह ते शालतिएल जम्मया, कने शालतिएल त जरुब्बाबिल जम्मया, 13 जरुब्बाबिल ते अबीहूद जम्मया, अबीहूद ते इल्याकीम जम्मया, कने इल्याकीम ते अजीर जम्मया, 14 अजोर ते सदोक जम्मया, सदोका ते अखीम जम्मया, कने अखीमा ते इलीहूद जम्मया, 15 इलीहूद ते इलियाजार जम्मया, इलियाजारा ते मत्तान जम्मया, कने मत्ताना ते याकूब जम्मया,
यीशुये रा जन्म
(लूका 1: 26-38; 2:1-7)
16 याकूब ते यूसुफ जम्मया, सै जे मरियमा रा पति था, कने मरियमा ते यीशु जम्मया सै जे मसीह जाणया जां, 17 इआंई अब्राहमा ते दाऊदा तक चौदा पीढ़ियां हुईयां, कने दाऊदा ते बेबीलोन जो बंदी हुईने पजवाणे तक चौदा पीढ़ी, कने बंदी हुईने बेबीलोन जो पजवाये जाणे रे बगता ते मसीह तक चौदा पीढ़ियां हुई। 18 यीशु मसीह रा जन्म इस तरीके ने हुया, भई ताहली जे तिसरी माता मरियमा री मंगणी यूसुफा ने हुईगी, तां तिन्हारे मिलणे ते पैहले ई तिसारे पवित्र आत्मा रिया तरफा ते बच्चा रैईया । 19 पर तिसारा घराऔऴा यूसुफ इक भला माह्णु था कने लोकां रे बिच तिसारी बदनामी नीं करना चाहन्दा था, इस खातर तिने तिसाने सगाई तोड़नेरा निश्चा कित्या। 20 ताहली जे सै इन्हां गल्लां रे बारे च सोच्ची करां था तां सपने च तिसरे सामणे परमेशरा रा इक स्वर्गदूत परगट हुईने तिसने बोलणे लगया, “ओ यूसुफ! दाऊदा रे पुत्र, मरियमा जो अपणी घराऔऴी बनाणे ते मत डरदा कांभई सै बच्चा जे तिसारे पेटा चा सै पवित्र आत्मा रिया तरफा ते आ। 21 तिसा इक्क पुत्र जणना तू तिसरा नौं यीशु रक्खयां, कांभई तिस अपणे लोकां जो तिन्हारे पापां ते छुटकारा देणा।”
22 ये सब किछ इस खातर हुया भई सै गल्ल जे परमेशरे भविष्यबक्ते जो गलाणे जो बोली थी, सै पूरी हुई जो: 23 “देक्खा, इक क्वारिया कुड़िया गर्भवती हुणा कने तिसा इक्की मुन्डुये जो जन्म देणा, कने तिसरा नौं इम्मानुएल रक्खया जाणा, “तिसरा मतलब ये हुया भई परमेशर अहांने सौगी आ। 24 फेरी यूसुफे परमेशरा रे दूता रे हुक्मा रे मुताबिक निंदा ते जाग्गीने घरा औऴी अपणे घरें ल्यान्दी; 25 कने तदुआं तक जे सै पुत्रा जो जन्म नीं देई बैठी, सै तिसाने सौगी नीं सुत्या: कने तिने तिसरा नौं यीशु रक्खया।