MATTHEW
मत्ती
यीशु री वंशावली
1
1 अब्राहमै री सन्तान, दाऊदै री सन्तान, यीशु मसीह री वँशावली 2 अब्राहमा न इसहाक पैदा हुआ, इसहाका न याकूब पैदा हुआ होर याकूबा न यहूदा होर तेइरै भाई पैदा हुऐ l 3 यहूदा होर तामारा न फिरिस होर ज़ोरह पैदा हुऐ; फिरिसा न हिस्रोन पैदा हुआ होर हिस्रोना न एराम पैदा हुआ । 4 एराम न अम्मीनादाब पैदा हुआ, अम्मीनादाबा न नहशोन होर नहशोना न सलमोन पैदा हुआ l 5 सलमोन होर राहाबा न बोअज़ पैदा हुआ । होर बोअज़ होर रूता न ओबेद पैदा हुआ होर ओबेदा न यिशै पैदा हुआ l 6 होर यिशै न दाऊद राज़ा पैदा हुआ l 7 होर दाऊदा न सुलेमान तेसा बेटड़ी न पैदा हुआ ज़ो पैहिलै उरिय्याह री लाड़ी ती l 8 होर सुलेमाना ना रहबाम पैदा हुआ, रहबामा ना अबिय्याह पैदा हुआ; अबिय्याह ना आसा पैदा हुआ होर आसा ना यहोशफात पैदा हुआ, यहोशफाता ना योराम होर योरामा ना उज्जियाह पैदा हुआ । 9 उज्जियाह ना योताम होर योतामा ना आहाज पैदा हुआ; होर आहाजा ना हिजकिय्याह पैदा हुआ । 10 होर हिजकिय्याह न मनश्शिह होर मनश्शिहा न आमोन पैदा हुआ होर आमोना न योशिय्याह पैदा हुआ । 11 होर बन्दी होइया बेबीलोन ज़ाणै रै बौक्तै योशिय्याह न यकुन्याह होर तेइरै भाई पैदा हुऐ l
12 बन्दी होइया बेबीलोन पुजणै न बाद यकुन्याह न शालतिएल पैदा हुआ होर शालतिएला न जरूब्बाबिल पैदा हुआ l 13 ज़रूब्बाबिला न अबीहूद हो अबीहूदा न इल्याकीम पैदा हुआ होर इल्याकीमा न अज़ोर पैदा हुआ l 14 अज़ोरा न सदोक होर सदोका न अखीम पैदा हुआ; होर अखीमा न इलीहूद पैदा हुआ । 15 होर इलीहूदा न इलियाज़ार होर इलियाज़ारा न मत्तान होर; मत्ताना न याकूब पैदा हुआ । 16 याकूबा न युसुफ पैदा हुआ जे मरियमा रा लाड़ा होर ज़ुणी न यीशु ज़ो मसीह सा पैदा हुआ l 17 इब्राहिमा न लेइया दाऊदा तक सेभ चौदह पीढ़ी हुई होर दाऊद न बेबीलोना बै बन्दी होईया पजाइणै तक चौदह पीढ़ी हुई l
यीशु रा जन्म
18 ऐबै यीशु मसीह रा जन्म ऐण्ढै तैरहै हुआ कि ज़ैबै तेइरी आमा मरियमै री मँगणी युसुफा सैंघै हुई, ता तिन्हरै कट्ठा मिलणै न पैहिलै ना मरियम पवित्र आत्मा सैंघै सुज़दी रौही l 19 तेसरै लाड़ै युसुफै ज़ो धर्मी ती होर तेसा बै बदनाम नी ती केरना च़ाँहदा तेसा बै च़ुप-चाप छ़ौड़नै रा विच़ार केरू l 20 ज़ैबै सौ इन्हा गल्लै रै बारै ना सोच़दा लागा ती ता प्रभु रा स्वर्गदूत तेइबै सुपनै ना हेरुइया बोलदा लागा; “ओ युसुफ दाऊदै री सन्तान तू आपणी लाड़ी मरियमा बै आपणै औखै आणनै बै मत डौरदा किबैकि ज़े तेसरै पेटा ना सा सौ पवित्र आत्मै री धिरै ना सा ।” 21 तेसा बेटा जोंणना होर तू तेइरा नाँ यीशु रखेई, किबैकि तेई आपणै लोका रा तिन्हरै पापा ना उद्धार केरना l 22 ऐ सेभ किछ एथै री तक हुआ कि ज़े वचन प्रभुऐ भविष्यवक्तै रै द्वरा बोलू सा सौ पूरा लोड़ी हुआ l 23 कि, “हेरा कुँआरी सुज़दी रौहणा होर एक बेटा ज़ोंणना होर तेइरा नाँ इम्मानुएल रखिणा ज़ौसरा मतलब सा 'परमेश्वर आसा सैंघै ।” 24 युसुफै नींजा ना उठिया प्रभु रै दूतै रै बोलणै रै मुताबिक आपणी लाड़ी आपू आगै आणी l 25 होर ज़ाँ ढौई तेसै बेटै बै जन्म नी धिना सौ तेसा सैघै नी सुता होर ज़ैबै तेसै बेटै बै जन्म धिना ता युसुफै तेई शोहरू रा ना यीशु रखू l