Matthew
मत्ती
1
1 अब्राहमके बेटा, दाउदके बेटा, येशु मसीहके बंशावली : 2 अब्राहम इसहाकके बाप रहै | इसहाक याकुबके बाप रहै, याकुब यहूदा आर ओकर भ्यासबके बाप रहै, 3 यहूदा फारेस आर जाहेरके बाप रहै | ओकरसिके म्या तामार रहै | फारेस हेस्रोनके बाप, हेस्रोन अरामके बाप , 4 अराम अम्मिनादाबके बाप, अम्मिनादाब नह्सोनके बाप, नह्सोन सल्मोनके बाप, 5 सल्मोन बोअजके बाप रहै | ओकर म्या राहब रहै | बोअज ओबेदके बाप रहै | ओकर म्या रुथ रहै | ओबेद यिसैके बाप, 6 यिसै दाउद राजाके बाप रहै | दाउद सुलेमानके बाप रहै | ओकर म्या उरियाहके पत्नी रहै | 7 सुलेमान रहबामके बाप रहै, रह्बाम अबियाके बाप, अबिया आशाके बाप , 8 आसा यहोशापातके बाप, यहोसापात यहोरामके बाप, यहोराम उज्जियाहके बाप, 9 उज्जियाह योतामके बाप, योताम आहाजके बाप, आहाज हिजिकियाके बाप, 10 हिजिकिया मनश्शेके बाप, मनश्शे अमोनके बाप, अमोन योशियाहके बाप 11 योशियाह यकोनीयास आर ओकर भ्यासबके बाप रहै | उसब बेबिलोनमें यहुदीसिके बन्दी बन्याके लजाबैसे पहिला जन्मलै रहे | 12 बेबिलोनमें बन्दी बन्याके लजैलके बाद : यकोनियस शालतिएलके बाप रहै, शाल्तिएल यरुबाबेलके बाप, 13 यरुबाबेल अबिउदके बाप, अबिउद एल्याकिमके बाप, एल्याकिम आजोरके बाप, 14 आजोर सादोकके बाप, सादोक आखिमके बाप, आखिम एलिउदके बाप, 15 एलिउद एलाजारके बाप, एलाजार मतानके बाप, मतान याकुबके बाप रहै | 16 याकुब उहा योसेफके बाप रहै, जकर पत्नी मरियम रहै, इहा मरियमसे येशुके जनम भेलै, जकरा मसीह कहैछै | 17 एरंके अब्राहमसे दाउदतक चौंद पुस्ता भेलै, आर दाउदके समयसे बेबिलोनमें भगैल समयतक चौंद पुस्ता, आर बेबिलोनमें भगैल समयसे मसीहके समयतक चौंद पुस्ता भेलै | 18 येशु मसीहके जनम एरंके भेलै : ओकर म्या मरियमके मगनी योसेफके संगे भेल रहै, मगर ओकरसिके बिहा हुऐसे पहिलेसे मरियम पेटसे छै कहिके मालुम भेलै | 19 ओकर हुएबाला पति धार्मिक आदमी हुऐके कारणसे, मरियमके बेइज्जत नैकरे चाहैके कारणसे ओकरा गुप्तमें त्यागैके इच्छा कैल्कै 20 मगर ऊ जब यी बातसब बिचार कर्ते रहै, सपनामें परमेश्वरके दुत देखा पड्लै आर ओकरा एरं कहैल्कै, “ योसेफ दाउदके बेटा, मरियमके पत्नी बनाबैले नैडरा, कहिनेकी जे ओकर पेटमें छै, ऊ पवित्र आत्मासे छै | 21 ऊ एकटा बेटा जन्मैतौ आर तुहें ओकर नाम येशु राख्बहैं, कहिनेकी ऊ आपन आदमीसिके ओकर पापसे बचैतै |” 22 अगमवक्ताके द्वारा परमप्रभुके बोल्ल बचन पुरा हुऐले यीसब भेलै छे : 23 " देख् , एकटा लड्की गर्भधारण कर्तै, आर ऊ एकटा बेटाके जन्म देतै, आर ओकर नाम इम्मानुएल राख्ल जैतै, “ जकर मतलब छै, “ परमेश्वर हमरसिके संगे |”" 24 योसेफ निनसे जाग्लै, आर परमप्रभुके दुतके कहैल जुगुर ऊ मरियमके आपन पत्नीके रुपमें स्वीकार कैल्कै | 25 जबतक मरियम बेटा नैजन्मैल्कै तबतक योसेफ ओकरसे सहवास नैकैल्कै | योसेफ ओकर नाम येशु राखल्कै |