MATTHEW
मत्ती
यीशुओ खानदान
(लूका 3:23-38)
1
1 अब्राहमें शोहरू, दाऊदे शोहरू, यीशू मसीहो खानदान। 2 अब्राहमा का हुअ इसहाक, इसहाका का हुअ याकुब और याकुबे हुऐ यहूदा और तेऊए होर भाई। 3 यहूदा का हुअ फिरिस, ता, यहूदा और तेऊए लाळी तामारा का हुअ ज़ोरह; ता, फिरिसा का हुअ हिरोन और तेऊ का हुअ एराम। 4 एरामा का हुअ अमीनादाब, ता अमीनादाबा का हुअ नहशोन और तेऊ का हुअ सलमोन। 5 सलमोन और तेऊए लाळी राहाबा का हुअ बोअज ता बोअज और तेऊए लाळी रुता का हुअ आबेद, और आबेदा का हुअ यिशै 6 और यिशैओ शोहरू त दाऊद राज़अ। दाउदो शोहरू सुलैमान हुअ तेसा बेटळी का ज़ुंण पैहलै उरियाह सैनापतिए लाळी ती।
7 सुलैमाना का हुअ रहबाम, रहबामा का हुअ अबिआह, अबियाह का हुअ आसा, 8 आसा का हुअ यहोशापात, ता यहोशापाता का हुअ योराम और योरामा का हुअ उज़ियाह। 9 उज़ियाह का हुअ योताम ता योतामो हुअ आहाज़ और अहाजा का हुअ हिज़कियाह। 10 हिज़कियाह का हुअ मनशिह और तेऊ का हुअ आमोन और आमोना का हुअ योशियाह। 11 बेबूले गुलामी दी नाशदी बारी हुअ योशियाह का यकुनया और तेउए होर भाई।
12 बेबूले गुलामी दी नाशी करै हुअ यकुनया ता तेऊ का हुअ शालतिएल और शालतिएला का हुअ ज़रूबाबिल। 13 ज़रूबाबिला का हुअ अबिहूद ता अबिहूदा का हुअ इल्याकीम और इल्याकिमा का हुअ अजोर। 14 अजोरा का हुअ सदोक ता तेऊ का हुअ अखीम और अखीमा का हुअ इलीहूद। 15 इलिहूदा का हुअ इलियाजर ता तेऊ का हुअ मतान और मताना का हुअ याकुब। 16 याकुबा का हुअ युसुफ; ज़ुंण मरिअमों लाळअ त; ज़सा का प्रभू यीशू मसीह हुअ।
17 अब्राहमा का दाऊदा तैणीं हुई कुल च़ौदा पोस्ती, ता दाऊदा का बेबुले गुलाम हणै तैणीं बी हुई च़ौदा पोस्ती और तिधा का यीशू मसीहे ज़ल्मा तैणीं बी हुई च़ौदा पोस्ती।
यीशूओ ज़ल्म
(लूका 1:26-38; 2:1-7)
18 ज़धू यीशू मसीहो ज़ल्म हुअ, सह हुअ इहय करै कि ज़ांऊं तेऊए आम्मां मरिअमे बरनी युसुफा संघै लाई, ता तिन्नेंं कठा हणै का पैहलै हुई मरिअम पबित्र आत्मां करै गुरभणीं। 19 तेसरअ लाळअ यसुफ त धरमी आदमीं, सह निं च़ाहंदअ त तेसा बदनाम करनअ और तेऊ‍ किय च़ुप-च़ुपै तेसा छ़ाडणेंओ बच़ार। 20 ज़ांऊं सह इन्नांं गल्ला सोच़दअ त लागअ द, ता परमेश्वरो एक स्वर्गदूत तेउए सुपनैं धेछुअ और तेऊ दुतै युसुफा लै बोलअ, “हे युसुफ, दाउदे शोहरूआ, तूह निं मरिअमा संघै बैहा करनै का डरी, अह आसा पबित्र शोहरी, किल्हैकि ज़ुंण तेसे गर्भा दी आसा, सह आसा पबित्र आत्मां करै तेसा भितरी। 21 तेसरअ हणअ एक शोहरू और तूह डाहै तेऊ नांअ 'यीशू', तेऊ दैणअ आपणैं लोगा लै पापमुक्त करी करै मोक्ष।"
22 इहय हुअ तै, कि ज़ुंण वाणीं भबिष्याबाणीं करनै आळै बोलअ त सह हणअ त पूरअ कि, 23 “हेरा, एक कुंआरी हणीं गुरभणीं; ता, तेसा दैणअ एकी शोहरू लै ज़ल्म और तेउओ नांअ डाहणअ "इम्मानुएल" तेतो अर्थ आसा इहय कि ‘परमेश्वर आसा हाम्हां संघै।’ 24 यसुफ निंजा का उझ़ुअ और ज़िहअ सबर्गदुतै तेऊलै सुपनैं बोलअ थिय, तेसा गल्ला मनी करै किय तेउ मरिअमा संघै बैह; 25 और ज़ेभै तैणीं तेसरअ शोहरू नांईंं हुअ, तेभै तैणीं निं तेसा संघै कठा सुतअ आथी तेऊ डाहअ तेऊ शोहरूओ नांअ यीशू॥