MATTHEW
मत्ती
1
1 अब्राहम कर संतान, दाऊद कर संतान, यीशु मसीह कर बंशावली | 2 अब्राहम ले इसहाक हर जनमिस, इसहाक ले याकूब हर जनमिस, याकूब ले यहूदा अउ ओकर भाई मन जनमिन, 3 यहूदा अउ तमार ले फिरिस अउ जोरह जनमिन, फिरिस ले हिस्त्रोन हर जनमिस, अउ हिस्त्रोन ले एराम हर जनमिस, 4 एराम ले अम्मिनादाब हर जनमिस, अम्मिनादाब ले नहसोन हर, अउ नहसोन ले सलमोन जनमिस, 5 सलमोन अउ राहाब ले बोअज हर जनमिस, बोअज अउ रुत ले ओबेद हर जनमिस, अउ ओबेद ले यिशै जनमिस, 6 अउ यिशै ले दाऊद राजा हर जनमिस | अउ दाऊद ले सुलेमान हर ओ महिला ले जनमिस जेहर आगू उरिय्याह कर घर दारिन रहिस, 7 सुलैमान ले रहबाम हर जनमिस, रहबाम ले अबिय्याह हर जनमिस, अउ अबिय्याह ले आसा हर जनमिस, 8 आसा ले यहोशाफात हर जनमिस, यहोशाफात ले योराम हर जनमिस, अउ योराम ले उज्जियाह हर जनमिस, 9 उज्जियाह ले योताम हर जनमिस, योताम ले आहाज हर जनमिस, अउ आहाज ले हिजकिय्याह हर जनमिस, 10 हिजकिय्याह ले मनश्शिह हर जनमिस, मनश्शिह ले आमोन हर जनमिस, अउ आमोन ले योशिय्याह हर जनमिस ; 11 अउ बांधल जाए से बेबीलोन म जाए तक कर समय म योशिय्याह ले यकून्याह, अउ ओकर भाई मन जनमिन | 12 बंधुवा होए के बेबीलोन पहुचाए जाए कर आगू यकुन्याह ले शालतिएल जनमिस, अउ शालतिएल ले जरुब्बाबिल हर जनमिस, 13 जरुब्बाबिल ले अबिहूद हर जनमिस, अबिहूद ले एल्याकीम हर जनमिस, अउ एल्याकीम ले अजोर हर जनमिस, 14 अजोर ले सदोक हर जनमिस, सदोक ले अखीम हर जनमिस, अउ अखीम ले एलीहूद हर जनमिस, 15 इलीहूद ले इलियाजार हर जनमिस, इलियाजार ले मत्तान हर जनमिस, अउ मत्तान ले याकूब हर जनमिस, 16 याकूब ले यूसुफ हर जनमिस, जेहर मरियम कर घरदार रहिस, अउ मरियम ले यीशु जेहर मसीह भी कहलाथे, जनमिस | 17 ऐ मन्धे अब्राहम ले दाऊद तक ले चउदह पिड़ही होईस, अउ दाऊद ले बेबीलोन ले बंधुवा होए के पहुचाए जाए तक चउदह पिड़ही, अउ बंधुवा होए के बेबीलोन ला पहुचाए जाए कर समय तक ले मसीह तक ले चउदह पिड़ही होईस | 18 यीशु मसीह कर जनम ऐ मन्धे ले होईस, कि जब यीशु कर दाई मरियम कर सगाई यूसुफ कर संग म होए रहिस, त ओमन कर जुटे कर आगूच ले मरियम हर पवित्रआत्मा कती ले गर्भ ले पाल गईस | 19 तले मरियम कर घरदार यूसुफ हर जे धरमी रहिस अउ मरियम ला बदनाम करे बर नी चाहत रहिस, ओला चुपके ले छोएड़ देहे बर बिचार करिस | 20 "जब यूसुफ हर ऐ गोएठ कर बिचार म ही रहिस की त प्रभु कर स्वर्ग दूत हर ओला सपना म दिखाई देके कहे लागिस, "हे यूसुफ ! दाऊद कर संतान तय अपन घरदारिन ला अपन हिया ले आए बर झिन डर, काबर की जे मरियम कर गर्भ म हे ओहर पवित्र आत्मा कती ले हे |" 21 ओहर बेटा जनमाही अउ ओकर नाव यीशु रखबे, काबर की ओहर अपन मैनसे मन कर पाप ले उध्दार करही | 22 ऐहर सब एकरे बर होही कि जे बचन ला प्रभु अपन भविष्यध्दक्ता मन कर द्वारा कहे रहिस ओहर पूरा होए : 23 'देखा, ऐक कुमारी हर गर्भवती होही अउ ऐक बेटा ला जनमाही, अउ ओ बेटा कर नाव इम्मानुएल रखल जाही, जेकर अर्थ है परमेश्वर हमर संग म | 24 तब यूसुफ नींद ले जागिस अउ प्रभु कर दूत कर हुकूम अनुसार अपन घर दारिन ला अपन हिया ले लानिस ; 25 अउ जब तक ले मरियम हर बेटा ला नी जनमईस तबले यूसुफ हर मरियम कर लिघे नी गईस : अउ ओहर ओकर नाव यीशु रखिस |