MATTHEW
मत्ती
यीशु मसीह दा खानदान
( लूका 3 : 23-38 )
1
1 अब्राहमें दा वंश कने दाऊदे दा वंश कने यीशु मसीह दा खानदान । 2 अब्राहमें ते इसहाक कने इसहाके ते याकूब पैदा होया, याकूबे ते यहूदा कने तिसदे भाऊ पैदा होये, 3 यहूदा कने तामार ते फिरिस व जोरह पैदा होये, फिरिसे ते हिस्रोन पैदा होया, कने हिस्रोने ते एराम पैदा होया, 4 एरामे ते अम्मीनादाब पैदा होया, अम्मीनादाबे ते नहशोन, कने नहशोने ते सलमोन पैदा होया, 5 सलमोने कने राहबे ते बोअज पैदा होया, बोअजे कने रूते ते ओबेद पैदा होया, कने ओबेदे ते यिशै पैदा होया, 6 कने यिशै ते दाऊद राजा पैदा होया, कने दाऊदे ते सुलैमान तिसा जणांसा ते पैदा होया जेह्ड़ी पैहले उरिय्याह दी लाड़ी थी । 7 सुलैमाने ते रहबाम पैदा होया, रहबामे ते अबिय्याह पैदा होया, कने अबिय्याह ते आसा पैदा होया, 8 आसा ते यहोशाफात पैदा होया, यहोशाफाते ते योराम पैदा होया, कने योरामे ते उज्जियाह पैदा होया, 9 उज्जियाह ते योताम पैदा होया, योतामे ते आहाज पैदा होया, कने आहाजे ते हिजकिय्याह पैदा होया, 10 हिजकिय्याह ते मनशिशह पैदा होया, मनशिशह ते आमोन पैदा होया, कने आमोने ते योशिय्याह पैदा होया; 11 कने कैदी होई नैं बेबीलोन जाणे दे बग्त च योशिय्याह ते यकुन्याह कने तिसदे भाऊ पैदा होये ।
12 कैदी बणांई नैं बेबीलोने च पज्जाणे दे बाद यकुन्याह ते शालतिएल पैदा होया, कने शालतिएल ते जरुब्बाबिल पैदा होया, 13 जरुब्बाबिल ते अबीहूद पैदा होया, अबीहूद ते इल्याकीम पैदा होया, कने इल्याकीम ते अजोर पैदा होया, 14 अजोरे ते सदोक पैदा होया, सदोके ते अखीम पैदा होया, कने अखीम ते इलीहूद पैदा होया, 15 इलीहूदे ते इलियाजार पैदा होया, इलियाजारे ते मत्तान पैदा होया, कने मत्ताने ते याकूब पैदा होया, 16 याकूबे ते यूसुफ पैदा होया, जेह्ड़ा मरियमा दा मंगेतर था कने मरियमा ते यीशु जिसियो मसीह भी ग्लांदे हन पैदा होया । 17 इस तरीके नैं अब्राहमे ते दाऊदे तिकर चौदा पीढ़ियां होईयां, कने दाऊदे ते बेबीलोन तिकर कैदी बणी नैं पुज्जणे तिकर चौदा पीढ़ी, कने कैदी बणांई नैं बेबीलोन जो पज्जाणे दे बग्ते ते मसीह तिकर चौदा पीढ़ियां होईयां ।
यीशु मसीह दा जन्म
( लूका 1 : 26-38; 2 : 1-7 )
18 यीशु मसीह दा जन्म इआं होया, कि जाह्लू तिसदी मां मरियमा दी मंगणी यूसुफे कने होई गैई, तां तिन्हां दे इक्क होणे ते पैहले ई सैह पवित्र आत्मां मिलणे दिया तरफा ते गर्भवती होई । 19 यूसुफ जेह्ड़ा मरियमा दा होणे आळा लाड़ा था, इक्क धर्मी माणु था कने तिसा जो बदनाम नी करणां चाहंदा था एह सोची करी तिन्हीं तिसा जो चुपचाप छड्डी दैणे दा वचार कित्ता । 20 जाह्लू सैह इन्हां गल्लां जो सोचा ई करदा था, तां परमात्में दा सुअर्गदूत तिसियो सुपणे च दुस्सी नैं ग्लाणां लग्गा, “हे यूसुफ ! दाऊद दी औलाद, हुण तू अपणियां लाड़िया मरियमा जो अप्पु अल्ल रखणे ते मत डर, क्जोकि जेह्ड़ा तिसा दे पेटे च ऐ, सैह पवित्र आत्मां दिया तरफा ते ऐ । 21 सैह जागत जम्गी कने तू तिसदा नां यीशु रखेयां क्जोकि सैह अपणे लोकां दा तिन्हां दे पापां ते उद्धार करगा ।”
22 एह सब कुच्छ इसतांई होया कि जेह्ड़ा वचन प्रभुयें भविष्यवक्ता दुआरा ग्लाया था, सैह पूरा होयें, 23 दिखा, इक्की कुआंरिया कुड़िया लैरथिया होणां कने इक्क जागत जम्मणां, कने तिसदा नां इम्मानुएल रखेया जांगा,” जिसदा मतलब ऐ, परमात्मां अहां सौगी । 24 ताह्लू यूसुफ निंदरा ते जागी करी प्रभु दे दूते दे हुक्मे मताबक अपणिया लाड़िया जो अपणे अल्ल लैई आया । 25 कने जाह्लू तिकर मरियमा जागते जो जन्म नी दित्ता ताह्लू तिकर युसुफें तिसा सौगी लाड़ा - लाड़ी आळा रिश्ता नी रखया, कने जाह्लू जागत पैदा होया तां तिन्हीं तिसदा नां यीशु रखेया ।